За да избегнеме што е можно повеќе остатоци од боја по завршување со бојадисувањето, прво се препорачува да се обидеме да пресметаме што е можно попрецизно колку боја ви е потребна за ѕидовите што сакаме да ги бојадисаме. Исто така, важно е да се знае дали е потребен само еден слој или дали ќе треба да се нанесат уште неколку слоеви на површината. Бројот на слоеви зависи главно од тоа дали има дамки или друга боја на површината што ќе ја бојадисувате (посилните нијанси на боја обично бараат еден или два слоја повеќе од вообичаеното).

Во никој случај не смее да се истура остатокот од боја во канализација или на земја бидејќи таквите супстанции ја загадуваат животната средина, како и подземните води.

Употреба на остатоци од боја за други креативни проекти 

Остатокот од боја е одлична можност да започнете со разни креативни проекти кои можеби во спротивно не би ги реализирале. Еден начин да го искористите остатокот од бојата е да купите или да направите сопствени матрици со кои можете да направите интересни дезени на ѕидот и со тоа да го „зачините“ просторот. Постапката најдобро се извршува со тркалезна четка во помала големина. Нанесете ја бојата на ѕидот со лесно тапкање, внимавајќи да не нанесете премногу боја на четката, бидејќи таа може да се прелее по ѕидот.

Наместо да користите матрици, можете исто така да креирате геометриски форми на ѕидот со помош на заштитна лента. Притоа, мора да се осигурате дека заштитната лента е цврсто прилепена на ѕидот за да не падне додека го пополнувате примерокот со боја. Кога премачкувате мазни површини, доволен е еден слој на боја, без оглед дали користите матрица или заштитна лента во проектот.

Доколку немате при рака заштитна лента или матрица, можете да користите и креда или обичен молив со кој лесно ќе ја нацртате саканата шема, која лесно ќе ја пребојадисате како што сте замислиле со остатокот од бојата.

Складирање на остатоците од боја 

Остатоците од боја се складираат во просторија во која нема да замрзнат. Повеќето бои може да се складираат на суво место каде што температурата не паѓа под 5°C и не достигнува повеќе од 35°C. Исто така, производот не смее да биде изожен на директна сончева светлина. Ако повторно го отворите пакувањето со остатокот од боја по подолг период, добро измешајте го пред употреба.

Рециклирање на остатоците од боја

Како што веќе споменавме, неправилното исфрлање на остатоците од боја може да биде проблематично, особено од еколошка гледна точка, бидејќи тие се класифицирани како опасен отпад за животната средина. Многу депонии не прифаќаат бои бидејќи немаат соодветни капацитети за складирање и последователно рециклирање. Информации за соодветни места за собирање или рециклирање на остатоци од боја, исто така, може да се најдат на продажните места за бои.

Меѓутоа, ако сакате сами да се ослободите од остатокот од бојата, важно е да откриете за каков вид на боја станува збор или врз каква основа е истата направена. Наједноставен начин да дознаете е да ја прочитате етикетата на пакувањето.

Бојата на база на латекс или акрил не треба да се фрла во обична корпа за отпадоци додека не се исуши целосно и не се стврдне (овој процес може да потрае неколку дена, во зависност од температурата и влажноста). За побрзо сушење и стврднување на бојата, чувајте ја на топло или добро проветрено место. Кога овој вид на боја ќе се стврдне, извадете го исушениот материјал од пакувањето и фрлете го во корпа за отпадоци и соодветно рециклирајте го празното пакување или конзервата од боја.

Маслените и алкидните бои, вклучително и емајлите и лаковите, се опасен отпад што подлежи на построги правила и упатства за исфрлање. Никогаш не дозволувајте таквите видови на боја да се исушат, како што можете со латекс или акрилни бои, бидејќи тие можат да испуштаат штетни гасови и да содржат хемикалии што можат да ја загадат почвата и следствено подземните води, септичките јами и водотеците. За да избегнете несакани проблеми, ве советуваме да се консултирате со специјализираната продавница во која сте ја купиле бојата или да контактирате центар за опасен отпад каде што ќе ви дадат информации за соодветно место за собирање или депонија за овој вид отпад.

Враќање на остатоците од боја во продажното место 

Информации за правилно и безбедно ракување со остатоци од боја можете да најдете во повеќето продавници за боја. Многу продажни места, исто така, организираат отстранување и рециклирање на вишокот боја на специјализирани места или фабрики.

Донација на боја 

Ако количината на боја што ви останува е поголема, исто така, можете да ја донирате во добротворни или непрофитни организации, каде што дефинитивно ќе биде корисна. Некои од овие организации се вклучени, на пример, во обезбедување домување за бездомници, социјално загрозени семејства, реновирање младински центри, градинки и образовни институции. Вашиот вишок боја сигурно ќе ви се најде за проект за реновирање или освежување на просторија.